مەملەكەت باسشىسى ن. نازارباەۆتىڭ «100 ناقتى قادام» ۇلت جوسپارىن جۇزەگە اسىرۋ اياسىندا جاڭا قۇقىق قورعاۋ قىزمەتىنىڭ اشىلۋ ءراسىمى ءوتتى.
وعان قاتىسقان وبلىستىق سوتتىڭ توراعاسى ەرلان ايتجانوۆ تەرگەۋ سۋدياسىنىڭ جۇمىسىن جانداندىرۋ تالاپتارى بەس ينستيتۋتسيونالدىق رەفورمانى جۇزەگە اسىرۋ جونىندەگى ۇلت جوسپارىنىڭ 22-قادامىندا اتاپ كورسەتىلگەنىن جەتكىزدى. ول ءوز سوزىندە ادامنىڭ جانە ازاماتتاردىڭ كونستيتۋتسيالىق قۇقىعىن شەكتەيتىن بارلىق تەرگەۋ قىزمەتى جونىندەگى وكىلەتتىلىكتى تەرگەۋ سۋدياسىنا بىرتىندەپ بەرۋدى قامتاماسىز ەتۋ ارقىلى سوتتا ايىپتالۋشى جانە قورعاۋشى اراسىنداعى تەڭگەرىمدى قامتاماسىز ەتۋ ماقساتى قويىلعانىن, بيىل ەلىمىزدىڭ بارلىق ايماقتارىندا مامانداندىرىلعان تەرگەۋ سوتتارىن قۇرۋ تۋرالى پرەزيدەنت جارلىعى شىققانىن, وركەنيەتتى ەلدەرى تاجىريبەسى بارلىق ساتىداعى سوت جۇيەسىنە ەنگىزىلەتىنىن اتاپ كورسەتتى.
العاشقى كەزدە تەرگەۋ سۋدياسىنا قاراپ-تەكسەرۋ, ءتىنتۋ, ايعاق زات الۋ وكىلەتتىگى عانا بەرىلسە, بۇگىندە ونىڭ قۇزىرەتىنە كۇزەتپەن ۇستاۋ, قاماۋعا الۋ, ونىڭ مەرزىمىن ۇزارتۋ, لاۋازىمىنان ۋاقىتشا شەتتەتۋ, م ۇلىككە تىيىم سالۋ سياقتى وكىلەتتىكتەر كىرەدى. قىلمىستىق ءىس جۇرگىزۋدىڭ سوتقا دەيىنگى ساتىلارىنا سوت قاداعالاۋىنىڭ ەنۋى, بىرىنشىدەن, قارالىپ جاتقان ىستەردىڭ اشىقتىعىن اڭعارتسا, ەكىنشىدەن, ازاماتتاردىڭ قۇقىقتارى مەن بوستاندىقتارىن قورعاۋعا كەپىلدىك بەرەدى. بۇعان دەيىن ىستەردى پروكۋرورلار قاراپ, جەكە-دارا شەشىم قابىلداپ كەلگەن بولاتىن.
«تەرگەۋ سوتىنا كەلىپ تۇسكەن ماتەريالدى سۋديا 8 ساعاتتىڭ ىشىندە اشىق سوت وتىرىسىندا قاراۋعا مىندەتتى. وتىرىسقا بارلىق تاراپتار, اتاپ ايتقاندا, پروكۋرور مەن قورعاۋشى, كۇدىكتى مەن جابىرلەنۋشى دە شاقىرىلادى. وسىلايشا, سۋديا ولاردىڭ الدىندا شەشىمدى جاريا تۇردە قابىلدايدى», دەيدى وبلىستىق سوتتىڭ قىلمىستىق ىستەر جونىندەگى سوت القاسىنىڭ توراعاسى ۆلاديمير كيريلەنكو.
مامانداندىرىلعان تەرگەۋ سوتىنىڭ توراعاسى قىزمەتىن داۋرەن قايرات ۇلى اتقارادى.
ءومىر ەسقالي,
«ەگەمەن قازاقستان»
سولتۇستىك قازاقستان